Message sent By ONVO Guest • ONVO answers

سلام عليكم ،عندي مشكلة عاطفية محتاج نصيحتك فيها : انا في الجامعة في بت كانت من أبغض البنات لي،مرت السنين ورجعنا الجامعة آخر سنة،ووقعنا في مشروع تخرج سوا ،البت ظاهرها جريئة لكنها طلعت عكس تصوري الله يغفر لي غايتو . بقيت بميل ليها ،قلت الميلان دا عارض خفيف وبزول لكن شكله اتمكن فيني و م عايز اخش مع البت في علاقة لانو مبدئيا حررام و دا عرض ررجال ما بحق لي استبيحه ولو بالكلام ،فقدر ما حاولت اني اتجاوزها م قدرت و كل مرة ميلي ليها بزيد لدرجة بقيت اغار عليها و لو قلت ليها كدا غلط بتسمع كلامي طوالي .و اول مرة اجرب الشعور دا صراحة ،لدرجة قلت احل الموضوع دا بالحلال فقمت استخرت قلت اتقدم عديل و نا ما عندي اي حاجة لا بيت لا مال ولا غيرو،راس مالي تلفوني التعبان دا . فما عارف اتعامل مع الموضوع دا نهائيا غلبني ،فمحتاج نصايح منك او من المتابعين .وشكرا

يا أنون عندي ليك خبر جيّد، إنه مشكلتك دي قاعدة تحصل منذ الأزل مع أغلب الميلز واتكررت كتير، بالتالي ما حتتعب كتير لحدي تلقى حل يرضيك. حأوريك رأيي لكن الأسلم ليك تسأل شخص متخصص وذو خبرة مُلم بأمور الدين والأسرة..الخ، حيفيدك أكتر مني ومن الفولورز، وبقترح عليك "د.أحمد سالم" شوف درب استشارته بوين. أما رأيي أنا الشخصي، فهو إنك تعزم على إنك تتقدم ليها ثم تستخير، وتسعى في الموضوع دا بي جهد، ولو م زبطت كرر المحاولات بأكثر من طريقة، ولو برضو لا قدّر الله ما زبطت وجات لحظة سئمت المحاولة فيها، فاا اترك وفوّض أمرك لله وربنا حيرضّيك ويكتب الفيه الخير. قلت ليك تتقدم ليها ليه؟، لأنه "المحاولة" فيها احتمالين، يا نجاح يا فشل، أما عدم المحاولة فاا احتمالها الوحيد هو الفشل فقط. ومرارة عدم المحاولة اشدّ وأمرّ بكثير من مرارة المحاولة الفاشلة -لا قدّر الله-، أسعى وما تخلي المخاوف تلتهمك، إنت ساعي للخير وفي الخير .. ونِعم السعي دا والله! ونصيحة أخيرة، طالما هسي الموضوع ما معروف حيرسى على وين، انتبه لقلبك وما تستغرق في ايّ شعور لطيف بينك وبين نفسك، لأنه تكلفة الحاجة دي باهظة "حأتم كلامي في reply "