🪧 (@RTDIRL) • ONVO

حبيت ذوقك بختيار ملابسك، كنت افكر ايش المواقع والبراندات اللي تعتمدين تشترين منه؟ وبعيدا عن رغبتي بمعرفه الاجابه عن سؤالي، استشعرت جماليه كل صوره وابرازك للألوان بشكل ملفت للنظر

أول شي شكرًا عالإطراء الطيب والجميل اللي شبه راعيته بلا شك، ثانيًا والله ما أعتمد على براند محدد وكذلك أنا أعتمد عالخياطين يعني عادي جدًّا أقص أطراف الأكمام واستبدلها بموديل مختلف وأضيف كُلف مثلًا، أو أضيف تطريزه لطرف اللبس وهكذا..لذلك البعض يحس باختلاف بملابسي. كذلك الشي اللي أطبقه هو إني أعتمد عالتنسيق وهالشي استلهمته من الرسم عشان كذا ملاحظتك بمحلها أنا أعتمد الإبراز، يعني أعامل الملابس نفس اللوحة الفستان الفلاني أعامله نفس الثيم وش لمسة الإكسسوارات اللي تناسب هالثيم والشوز اللي يناسب الثيم هذا وعلى أساسه أشتري وكل شي آخذه من مكان وبحسب المكان اللي يوفر ممكن موقع، سوق، محل أقمشة.. إلخ ولكن أكثر موقع أعتمد عليه هو علي أكسبرس المتاجر هناك بحرررر من الكُلف والاكسسوارات واللمسات، أنبّش وأحفر فيه إلين أحصّل اللي أبغى هههههه

اقترحي كتاب يتكلم عن النفس

كتاب "أبي الذي أكره" للدكتور عماد رشاد ممكن الاسم يسبب لك تشتت ولكن على عكس ظاهره هو كتاب مرتبط بتنشئة الإنسان والتأثيرات اللي تصير له بالطفولة..الخ وله كتاب "أحببت وغدا" ما قريته بس عليه مدح، ممكن تجربين تقرينه أونلاين وتاخذين فكرة عنه، وكنت بعطيك اسم كتاب يمثل موسوعة مرتبطة بعلم النفس كامل بس باقي ما كملت جزئية كبيرة من قراءته لذلك ما احب اوصي على شي بدون اطلاع طويل ممكن بعد مدة تذكريني بعد ما اطلع عليه اكثر🤗

شكرًا ياريم كنتِ الشخص الصح ب اني اتكلم له عن المشكلة ولا ندمت اني شكيت لك عنها الله يفتح عليك ويسعدك

العفوو أجمعيين يا رب وكلي ثقة إنك بتوصلين لمرادك طالما إنك سعيتي للفهم والحل😙

‎عانيت من هالمشكلة من كم سنة عجزت احلها لطالما استمريت ادعي لنفسي ان ربي يشرح لي صدري وبالي ولكن فيه شي داخلي كأنه اقوى مني مهما حاولت اسيطر عليه كأن لب المشكلة هو تشتت ذهني ولكن عجزت اعالجه عموما اقدّر ردّك وتجاوبك لرسالتي 3>

الله يشرح صدرك وييسر أمرك لا معليك بتقدرين، طالما إنك عرفتي العلة بالضبط بتقدريين بس أعطي نفسك الثقة وتذكري أن ما فيه شي ينحل بغمضة كل شي بالتدرّج، ارفقي بنفسك وابدي بالتدريج، ولما تحسين إنك شديتي على نفسك بالحكم أسألي نفسك هل فيه دليل؟ لا طبعًا، وهذا يثبت أنها أوهام وليست حقيقة، وغيري معيار التقييم بدلًا من أن الهدف يكون أنهم يرضون عنك خلي الهدف أن الكلام والتصرف يرضي قيمك، ومن الأشياء المرتبطة بالتدرج هي إنك تعطين نفسك وقت محدد للمحاسبة ولا تعتبرينها محاسبة اعتبريها دروس وعبر مدة وقت بسيط كم دقيقة بس، ولا تتجاوزينها أبدًا وباذن الله بتطلعين بنتيجة، وكل هالأمور بإذن الله بتقلل من التصارع اللي تمرين فيه والتشتت اللي يصير معك، وأعييد أعطي نفسك الثقة وامشيي وتذكري انك ما تخاطبين قاضي بمحكمة كلها جلسة طبيعية مع ناس نفسنا

فعلاً ولا اختلف معك ابدا ولكن كل ماحاولت اكون على طبيعتي يجيني احساس اني صعبة التعامل وكأني لو تصرفت على ما انا بنفر اللي حوالي لا مو لأني شخص سيء بس مقدر انخرط بسهولة مع الناس واتصرف على طبيعتي معهم بسهولة شعور اني لازم اكوّن شخصية تقدر تندمج مع الناس كأنه شي اجباري حتى احافظ على علاقتي معهم يعني اللي حوالي لو احيانا ارمي كلمة مزح ياخذونها معي بجد صرت ارتاح بجانبي الجاد اكثر لأني احسني اتصرف فيه على طبيعتي اكثر

شوفي التعايش والتكيّف مع البشر شي مهم، ولكن المشكلة لما تطمسين نفسك أثناء التعايش، لذلك وجب عليك توازنين بين التعايش والتصرف على طبيعتك لأن التصنع يجهد النفس وممكن الحل يكون لما تفهمين متى الوقت المناسب للمزح ومتى الوقت المناسب لقول الكلام الفلاني، يعني مو ضروري المشكلة تكون بكلامك قد ماهي باختيار التوقيت المناسب، ولعلمك ممكن اللي حولك ما ينفرون من كلامك قد ما ينفرون من توترك، لأن كثرة المحاسبة والمراقبة تفقد الواحد ثقته فيصير متوتر ومتشتت، لذلك هذي وحدة من النقاط اللي لازم تفهمينها وتعالجينها "يعني مو ضروري ان العلة بكلامك قد ماهي بتوترك"، ولو حسيتي انك بتتعبين بالموازنة ابدي بالتدريج، خليك على طبيعتك بالتدرج الين توصلين لمرحلة الاعتياد، ولا تبالغين بمراقبة الناس، صدقيني بترتاحيين وبتلاقين فرق

كأن عشرات الشخصيات داخلي عشان اماشي اللي حوالي بس ضيعت من انا وفيه شي داخلي يقول لا انت تقدرين تكونين افضل بس هالشي كأنه يسلب مني اي ميزه ممكن امتلكها احسها داخلي تستضعفني وانا عارفه زين اني اقدر اكون اقوى كأنه شي يناظرني من بعيد ويحاول يسلب مني اي ميزه امتلكها كأني خايفه من شي بس ماعرف ماهيته بالضبط

أول شي دايم بداية حل أي مشكلة يكون من خلال الاعتراف فيها وفهمها وهذي حسنة تُحسب لك لأن قلة من يعرف يسمي مشكلته، ثاني شي مراقبة النفس ومحاسبتها شي طبيعي ولكن لما يزيد الموضوع عن حده وتبدين تراقبين كل حرف وكل ردة فعل، كذا يقلب الموضوع من محاسبة بغرض الإصلاح إلى محاسبة هوس وبدلًا من الإصلاح افكارك بتتشتت لذلك صار معك زي ما قلتي "مشكلة بالتواصل" لأن من كثر ما تحاسبين نفسك وتراقبين ردود أفعال الناس صار عندك تشتّت بأفكارك لأن تركيزك الأساسي على اللي حولك وعلى المحاسبة بدلًا من الأفكار نفسها، وهالشي برضو كوّن عندك خوف وتلوّن بالشخصيات عشان خايفة انك تزلين وتغلطين، ولكن تذكري عمر التصنع والتلوّن ما يفوّزك لأنه ما يمثل طبيعتك ولأنه يستنزف من خزان طاقتك، اقبلي بنفسك وطبيعتك وخلي الناس تقول اللي تقول لأن القاعدة"ما خُلقنا كاملين" اغلطي وزلّي عادي لأن هذا جزء من بشريّتنا وعشان اطمنك لو تفكرتي باللي حولك بتلاقين حتى هم عندهم زلات وعيوب وهذا طبيعي، ولعلمك ترى الناس ينسون،يعني كونك تبالغين بترقّبهم وتخافين تزلين ونحو ذلك،تراهم ينسون،وأخيرًا النفس تحتاج من يرفق فيها إذا ما كنتي أنتِ هالشخص فمن يكون؟

برد على آخر رسالة🤗

الله يجزاك خير ويرفع قدرك وإن شاء الله أكون عند حسن الظن

دور المرأة والرجل يتحدد بمن يتحمل المسؤولية وقت الشدة)) لو عملت المرأة لوقت متأخر لكن عارفه في قرارة نفسها لو انفصلت من العمل مثلا ماراح يأثر على معيشتها بسبب وجود زوجها اشوف الرجل هنا أمان معناه ماراح يطلع من دوره أو المرأة من دورها حتى لو ظاهرياً للمجتمع العكس ، وايضاً المرأة لو قصرت في دورها و عطائها بالبيت عارفة لو فعلاً الأمر يستدعي حضورها الدائم في البيت ماراح تتردد في الاستقالة ، لكن دام الرخاء موجود عادي المرأة تشتغل والرجل ينشغل بالنهاية وقت الشدة مالهم إلا بعض ومحد يطلع من دوره

الادوار ما تنحصر على شي واحد "المسؤولية" وللتوضيح فيه ادوار مشتركة مثل المسؤولية وفيه ادوار تكون لكل طرف بحسب اختلاف طبيعتهم اذا تجاوز الانسان طبيعته واخذ طبيعة الاخر بتكون فيه عقبات وتبعات، وبالنسبة لبقية كلامك فهذا اللي قصدته بالنقطة الاخيرة، وهو كيف يتعامل الانسان في حال أُجبر على دور مو دوره بدون ما يتخلى عن طبيعته، وسبب قولي "ما يتخلى عن طبيعته" لان انتِ قاعدة تتكلمين عن الاشخاص الفاهمين والواعين اللي هالشي ما يأثر فيهم، ولكن المؤسف ان فيه كثير غير فاهم و واعي ويتأثر، يعني ممكن وحدة لانها تشتغل لساعات طويلة تتلبس دور الرجل بلا وعي وتقوم بالبيت كامل من مصاريف ورعاية وتودي اطفالها المدارس..الخ، والسبب لانها انغمست بالدور وخرجت من طبيعتها، بدال ما تكون فاهمة وش اللي لها و وش اللي عليها من اساسيات كامرأة وكيف تحافظ على طبيعتها، وتأثّرها بهذا الدور بيخلي زوجها يتقاعس او ينسحب لان برضو مو كل رجل فاهم و واعي، والنتيجة تروح تشتكي "معد فيه رجال" وهو ينسحب بسبب سلبها الدور منه ويقول "معد فيه نساء"

مبروك الخطوبة

اتمنى تكون هذي اخر مرة تستخدمين فيها اقتراحات الكيبورد

انتبهي الله يسعدك صورتك جميلة لكن الساعد/الذراع من العورة

الله يجزاك خير ويهديني ويهدي الجميع

حتى الزواج ماصار رغبة طبيعة الآن زي قبل المعطيات تغيرت

فعلا رأي منطقي 💯

بداية اهنئك على طريقة تفكيرك ماشاءالله تبارك الله واسال الله ان يبارك فيك ولك …ثانيا ودي تعطيني مرجع او علاج لمن يهرب من بعض المواقف بالنوم الزايد

الله يجزاك خير، اجمعين يا رب المشكلة الاساسية تكمن بالهروب وليس النوم نفسه وممكن يساعدك اخصائي ملم بعمق بهذا المجال. بالنسبة للمراجع الصدق ما عندي مرجع تحدث عن "الهروب بالنوم" بشكل مباشر، ولكن برشح لك كتاب "المرحلة الملكية" للدكتور خالد المنيف لانه تحدث عن مشاكل كثيرة شائعة ومع حلول واسلوبه يتسم بتبسيط الفكرة والوضوح، والدكتور خالد غني عن التعريف مجرد ما تبحث عن اسمه باليوتيوب بتلاقي له مواد سمعية ومقابلات كثيرة انصحك فيها فهي ثرية بالفوائد وتساعد على التغيير بحول الله

وش يعني لك خسارة الإنسان لنفسه؟ احس اني شخص يكبر ويحس انه صار نسخة لنفسه افضل من الماضي بس بنفس الوقت يحس انه يخسر نفسه ، بالماضي كنت اعرف اصير الأفضل بس احس اني قاعده اخسر هالشي مااقولك ابحث عن المثاليه بس المزايا اللي فيني احسني قاعده اخسرها وماعرفت كيف اصير انا على طبيعتي كأني في كومة مشاكل بس هي حقيقة مشكلة وحده وعجزت القى لحلها من سنين وافكر الجئ لدكتور نفسي ولكن ترددت

اللي صاير معك مو خسارة مزايا مثل ما تعتقدين اللي صاير"خوف من التغيير"الانسان لما يبدا يكبر وينضج فكريا ويظهر افضل نسخة من ذاته راح يصير فيه تغييرات كثيرة وفيه اللي يتقبل هالتغييرات على طول وفيه اللي رغم تقبله الا انه يشعر ببعض التهديد ومرات هالشي طبيعي لان العقل يحاول يتأقلم بسبب انه اعتاد على اشياء ثم حصل تغيير فحس انه انسحب منه شي مألوف فيحس بشوي زعزعة بأمانه وملاذه،بغض النظر عن الاعتياد بالماضي سواء كان جيد او سيء بعضهم من شدة ارتفاع درجة اعتيادهم وخوفهم للتغيير يبغون يرجعون لحياتهم السابقة السيئة بسبب هذي الفكرة اللي قلتها! فالحل انك تحسنين من طريقة تفكيرك لان من خلال تحسينها بتتحسن نظرتك لنفسك ولهذا التغيير، ومن هذي الافكار هو انك تعتبرين هذا التغيير امتداد للماضي لان لولاه ما وصلتي لهذي النسخة، تقبلي وتصالحي مع اللي يصير وقيسي هالتغيرات على القيم والمنطق ومدى راحة شعورك هل تتناسب وتتوافق معها؟وجاوبي نفسك، وقارني شخصيتك الحالية بالسابقة من خلال المواقف وشوفي وش افضل نتائج تصرفاتك بالماضي او الحاضر؟هالشي بيساعدك على التقبل وبيخفف من حمل التعلق بنسختك السابقة اللي تحسين معها بالامان

لو سمحتي الكعب الأسود من وين ؟ 🥲

من علي اكسبرس، توي شيكت وللاسف سولد اوت (T_T)

لو قلت لك اقترحي لي كتب من ذائقتك وش تقترحين؟

بعطيك من كل بحر قطرة ونقي لك عاد: كتب التخفيف من ثقل الحياة والتوعية الذاتية: كتاب المرحلة الملكية - كتاب لا تحزن اقسام الكتب الدينية: -للمساعدة على محاربة النفس: كتاب ذم الهوى - كتاب الداء والدواء واذا حابته ملخص عندك كتاب بديل تحت عنوان "الشفاء مهذب كتاب الداء والدواء " -للتداوي: كتاب الطب النبوي لابن القيم الجوزية -للتفكر بأسماء الله وأثرها: كتاب لأنك الله "كتاب خفيف و واضح ومؤثر انصحك فيه" -فيما يخص الأديان الوثنية وللتوقي منها ومن ومداخيلها مثل الطاقة وغيرها: كتاب التطبيقات المعاصرة لفلسفة الاستشفاء الشرقية. خلصت من الدينية. كتاب رشحت لي اياه وحدة من المتابعات الله يعطيها العافية "كتاب الفردوس الأمريكي" يتكلم عن معضلات ومفارقات واجهت امريكا الحديثة ومن وجهة نظري اشوف كثير منها واجهت العالم اجمع لان اصبحنا نعيش وفق عولمة، لذلك انصحك فيه. فيما يخص الاستثمار: كتاب الاخطاء ال٥ التي يرتكبها جميع المستثمرين لـ بيتر مالوك

على طاري التغريدة الاخيره امي امس رجعت من الدوام معصبه و اول ما حطينا الغدا كانت مكشره و كل ما نكلمها انا و اخواني يا تسفهنا يا انها تنفجر في وجهنا على اسئله بسيطه بعد الغدا كلنا طرنا غرفنا و جلست هي في الصاله على الجوال لحالها ، منظرها حزّني بس قلت في نفسي لما اكبر و يصير عندي عيال بحاول ما اصير مثلها ولا مثل ابوي لانه يسوي مثلها بعد صدق مدري وش ذنبنا نحن.. دايما نكون متحمسين لرجعتهم للبيت و في النهايه يلاقونا كذا

اولًا المهم بالموضوع كله انك اخذتي درس منهم وهذا شي ممتاز لصالحك، غيرك يشوفهم نموذج وقدوة واذا اصبح بمحلهم مارس نفس الاسلوب على عياله، الشي الثاني حاولي تدورين وقت مناسب معهم لما يكون مزاجهم معتدل وحاولي تكلمينهم بخصوص هالمشكلة، ولا يضيق صدرك ترى كثير مثلك بسبب ان فيه اهالي ما يقصدون أذية ابناءهم لكن المشكلة انهم ما تعلموا كيف يفرغون تعبهم بشكل صحيح بدون ما يأثرون عالمحيط، والمهم بهذا كله انك ما تسمحين لهذا الشي يأثر فيك وتبسطين نفسك بنفسك لان هالامور احيانًا تأثر بالواحد بلا وعي اذا ما عرف يجنب نفسه مشاعرهم السلبية.

instagram?

اذا بنيّة تعالي خاص

Lvu u❤️

سولو لك تقدير عندي من قدامى المتابعين واعزهم luv ya more, no cap ^o^